Seoladh ‘OneClub’ ag Cumann Peile Naomh Abán i mBaile Mhúirne le déanaí. Eagraíodh lá spraoi iontach chun an ócáid a cheiliúradh, agus bhain gach duine taitneamh as!

Bhí SULT ar siúl i nGaoth Dobhair don ochtú bliain, ag mealladh na sluaite le Tinchy Stryder agus The Stunning. Tugadh ardán freisin do bhannaí áitiúla ar nós Na Trí Piontaí, Bainne agus Hannah B, a labhair le Molscéal ag an bhféile.

Reáchtáladh Aistear na nGael don tríú bliain as a chéile i mbliana – campa ar thug déagóirí ó Ghaeltachtaí ar fud na tíre aghaidh ar Cheantar na nOileán, chun seachtain den chéad scoth a chaitheamh i gcomhluadar a chéile.

Cuireadh an dara Fleadh Cheoil Dhún na nGall ar siúl ar an Chlochán Léith i mbliana. Ba deireadh seachtaine lán de chultúr agus traidisiún - amhránaíocht, damhsa, drámaíocht agus neart eile. Deireadh seachtaine den chéad scoth a bhí ann, a mheall daoine ó gach choirnéal den chontae.

Tá suíomh nua logainmneacha beo ag Comhlacht Forbartha Áitiúil Acla. Is féidir le gach duine rochtain a fháil ar logainmneacha Acla agus an t-eolas a bhaineann leo anseo https://acaill.com/logainmneacha/

D'oscail Róisín Nic Ruairí, captaen fhoireann Dhún na nGall, seastán úr páirc CLG Naomh Muire le gairid agus ba lá stairiúil a bhí ann don gcumann. Ba mhór an onóir do Róisín go raibh mná Dhún na nGall ag dul chun páirce don chéad uair ina cumann áitiúil.

Tá sé i gceist ag Cumainn Chamógaíochta Chorcaí agus Phort Láirge brístí gearra a chaitheamh i gCraobh Ceannais na Mumhan. Tá 83% d'imreoirí camógaíochta ag iarraidh go mbeadh an rogha acu scórta nó brístí gearra a chaitheamh.

Bua mór faighte ag Max Lally na hÉireann ina chéad throid ar chamchuairt MMA Cagewarriors.

An Lá Domhanda Feasachta ar Uathachas a bhí ann le déanaí agus rinne grúpa tuismitheoirí agóid taobh amuigh den Dáil ag iarraidh aird a tharraingt ar an easpa áiteanna cuí i scoileanna.

Bhí ranganna agus imeachtaí Gaeilge ar siúl sa Glen Park Estate san Ómaigh le linn Seachtain na Gaeilge. Bhí craic, ceol, scéalaíocht, sean-nós , yoga, ealaín agus neart eile sa ghleann thar an deireadh seachtaine.