Cuidigh leis an cheathrar cairde na fadhbanna a réiteach, puzáil a oibriú amach agus spraoi a bheith acu le codáin. Acmhainn léirithe ag an Chiste Craoltóireachta Gaeilge, Foras na Gaeilge, an tÁisaonad, CCEA agus Seedling Education.

Maidin Shathairn atá ann agus Mat traochta i ndiaidh seachtain a chaitheamh ar scoil ach músclaíonn sé agus áthas air cionn is go mbeidh sé ag dul chuig cluiche peile inniu lena athair. Ba mhaith le Mat fáil amach cén t-am a mbeidh siad ann.

Tá Mat go hiomlán gafa leis an pheil agus é ag iarraidh dul chuig na siopaí leis an léine peile is úire de chuid Dhún na nGall a cheannach. Cad é a dhéanfaidh sé muna bhfuil go leor aige lena cheannach!

Tá Mat, Siún agus a máthair sa teach nuair a chluineann siad veain uachtar reoite ag teacht. Impíonn na páistí ar a máthair airgead a thabhairt dóibh le huachtar reoite a cheannach ach níl aon bhriseadh ag a máthair, cad é a dhéanfaidh siad?

Caithfidh Mat agus Siún praghsanna do bhonnóga a oibriú amach ach tá Mat den bharúil go dtiocfadh leis an t-airgead a choinneáil dó féin.

Beidh Mamó agus Daideo na bpáistí ag teacht ar cuairt fá choinne cúpán tae agus ba mhaith leis na páistí brioscaí Nollag a bhácáil dóibh agus cruthanna a bhaineann leis an Nollaig orthu.

Tá na gasúir ina suí ag cur plean le chéile mar go bhfuil smaoineamh acu gnó a thoiseacht ag díol líomanáide le hairgead a shaothrú.

Cinníonn athair Mat tóraíocht taisce a eagrú do na páistí ionas gur féidir leis é a léamh faoi shuaimhneas. Tá na páistí an-iomaíoch faoin dúshlán atá curtha rompu chun cruthanna a bhailiú.

Iarrann athair Mat air cuidiú leispíotsa a roinnt go cothrom ach tá mearbhall ar Mat faoin méid uair a chaithfidh sé an píotsa a ghearradh ionas go mbeadh slisín ag achan duine!

Beidh tionscadal matamaitice ag Mat ar an tseachtain seo chugainn agus d’iarr a mhúinteoir air rudaí difriúla a mheá le fáil amach cé chomh trom agus éadrom is atá gach rud.